A CREATIVIDADE DE PABLO OTERO

 

O ilustrador ourensán Pablo Otero foi un dos invitados de PALABRAS NO AR, ao seu paso por Allariz. Para os escolares desta vila en particular, e do resto de Galicia en xeral, enviou un saúdo e unha petición…

“…Gustaríame pedirvos que forades o máis curiosos posible. Que vos fagades moitas preguntas. Que non teñades medo á hora de saír á rúa e coller cousas que atopedes por aí; cousas que non sexan de ningúen, ou que sexan de todos. Collédeas, cheirádeas. Paus, pedras, madeiras… Atesourádeas, porque moitas veces non se sabe para onde imos tirar. E disfrutade, simplemente!”

Durante a súa participación nos obradoiros de escrita, os alumnos e alumnas do CEIP Padre Feijóo fixéronlle unha interesante entrevista, na que abarcan aspectos tan sorprendentes como a orixe de libros como “Mateo”, “O príncipe das sombras” e “ABCdiario”, ou o significado do concepto creatividade.

SAÚDO DOS AUTORES DE ‘GARAVANCIÑO’

Olalla González e Marc Taeger, adaptadora e ilustrador de “Garavanciño”, editado por KALANDRAKA, envíanlles un agarimoso saúdo aos escolares de Allariz que participaron na campaña PALABRAS NO AR…

MÁIS DE 10.000 VISITAS AO BLOG DE ‘PALABRAS NO AR’

MOITAS GRAZAS A TOD@S 

 

100 PALABRAS NO AR

PALABRAS NO AR está de noraboa. Celebramos a ‘entrada’ número 100 deste blog, co que facemos un seguemento constante á campaña de dinamización lingüística coa que KALANDRAKA está percorrendo a xeografía galega. Queremos compartir este logro con toda a comunidade escolar, cos bibliotecarios e libreiros, cos lectores cativos e grandes que visitan este modesto recuncho da rede. Ogallá haxa cen motivos máis para seguir festexando o achegamento dos nenos e nenas galegos á nosa lingua e á nosa cultura. Moitas grazas por acompañarnos neste fermoso camiño de palabras, músicas e voces.

DERRADEIRO ‘PALABRAS’ EN ALLARIZ

O equipo de PALABRAS NO AR depídese de Allariz coa emisión do derradeiro programa radiofónico no que Olalla González e Marc Taeger, autores de “Garavanciño“, envían un agarimoso saúdo para todos os nenos e nenas da vila. Agradecemos  a colaboración de todos os que participastes nas acticidades e, especialmente, ao equipo de Cultura do Concello e á Radio Municipal de Allariz pola súa  axuda e complicidade.

Continuade atentos ás PALABRAS NO AR.

O CUARTO ‘PALABRAS’ DE ALLARIZ, XA NO BLOG

Xa podedes escoitar o cuarto espazo radiofónico de PALABRAS NO AR  directamente neste blog. Non perdades as interesantes reflexións que fai o artista plástico ourensán Pablo Otero a preguntas dos nenos e nenas de Allariz. Na súa intervención, relata cal é súa a relación coa vila do Arnoia. Continuade atentos á frecuencia de Radio Allariz para escoitar mañá o derradeiro programa desta etapa. Haberá máis invitados sorpresa…

MÁIS ‘PALABRAS…’ VOANDO POR ALLARIZ

O terceiro programa de ‘PALABRAS…’ xa está no ar! E ben seguro que moitos dos que nos seguides dende esta vila ourensá o teredes escoitado, non si? Se non o puidestes facer, non vos apuredes. Podedes descargalo, coma sempre, neste blog, accedendo á sección  PROGRAMAS  na barra lateral. E continuade atentos a Radio Allariz! No espazo radiofónico de mañá haberá un invitado moi especial que nos vai descubrir cousas sobre o seu traballo e a súa relación coa vila.

 

SEGUNDA EMISIÓN DE ‘PALABRAS…’ EN ALLARIZ

Escoitade hoxe en Radio Allariz, ás 13:05 e ás 15:00 horas, a segunda das nosas emisións, protagonizada polos nenos e nenas da vila ourensá arredor da campaña PALABRAS NO AR. E se non tedes oportunidade de sintonizalo no horario programado, descargádeo directamente nesta web.

COMEZAN AS EMISIÓNS DE ‘PALABRAS NO AR’ EN RADIO ALLARIZ

Como anunciaramos, hoxe retómanse as emisións radiofónicas de PALABRAS NO AR . Os novos programas acompañaranvos ata o 16 de outubro ás 13:05 e ás 15:00 horas, na sintonía de Radio Allariz (107,2 FM) . E para aqueles que non teñades a oportunidade de escoitalos a través do receptor, podedes facelo aquí mesmo ou por Internet, enlazando coa emisión dixital de Radio Allariz nos horarios programados. Moitas grazas a todos os nenos e nenas que teñen participado nas actividades, ao departamento de Cultura do Concello e, en especial, ao equipo de Radio Allariz pola súa colaboración.

PRÓXIMAS EMISIÓNS EN RADIO ALLARIZ

O BLOG DE ‘PALABRAS…’ XA TEN 5.000 VISITAS

 

Moitas grazas!

 

COMEDIAS DE ENLEO NO CASTELO DE ALLARIZ

Os obradoiros de escrita da campaña PALABRAS NO AR xiran en torno ao enleo reviravoltado e dan pé a simpáticos relatos de malentendidos, de ‘leva-e-trae’, que abofé serán do voso agrado. Botádelle un ollo a estes exemplos humorísticos onde, a cada volta e a cada novo personaxe, o que nun principio era, pasa a ser outra cousa cada vez máis divertida. Gozade da lectura destes relatos de “Enleo de naipes”:

UNHA MERENDA Á CARÓN DO RÍO

Despois de tanto traballar no obradoiro de escrita, os alumnos do C.E.I.P. Padre Feijóo de Allariz  quedaron cun pouco de fame, así que fomos de merenda á beira do río Arnoia.  Os cociñeiros e cociñeiras de quinto curso propuxeron un menú un tanto especial. Lede con atención as receitas porque, a verdade, é que foi unha merenda única!

 

ALLARIZ VIAXA NO TEMPO

As nenas e nenos do CEIP Padre Feijoo de Allariz  lévannos  cara ao medievo a través dos breves  relatos elaborados nos obradoiros de escrita da campaña PALABRAS NO AR. Esta pequena viaxe no tempo é tamén atemporal xa que non impide que aparezan personaxes coma Obama, as hipotecas, os banqueiros, e historias de todo tipo que nos traen de novo aos nosos días. Botádelle un ollo a esta pequena selección que de seguro vos vai encantar.

O BOI DE ‘GARABANCIÑO’, EN ALLARIZ

Hoxe foi un día moi especial para os nenos e nenas de 1º curso do CEIP Padre Feijoo de Allariz. Nunha estupenda mañá de outono, e despois de pasar diante do mercado, chegaron á Biblioteca Municipal para participar nas sesións de contos con música de PALABRAS NO AR. Alí agardábanos Pablo e Patricia cunha chea de personaxes, algún moi familiar para eles…